Չինաստանում կչիպավորեն կովերին
Չինաստանում Հարավարևմտյան Ցզյաոտոնգի համալսարանի գիտնականներն առաջարկել են կովերին չիպավորել՝ հետևելու նրանց առողջական վիճակին, գտնվելու վայրին և կենսապայմաններին: Գիտնականների աշխատանքը հրապարակվել է iScience ամսագրում, գրում է Gazeta.ru-ն։
Թիմը մշակել է խելացի սենսորներ, որոնք տեղադրվում են կովերի պարանոցի և ոտքերի վրա։ Նշվում է, որ սենսորների հավաքած տվյալները կփոխանցվեն բազային կայան, որտեղից հնարավոր կլինի հսկել կովերին։ Սարքը կաշխատի կինետիկ էներգիայից, որն առաջանում է, երբ կովը շարժվում է:
«Խոշոր եղջերավոր անասունների մոնիտորինգը կօգնի կանխարգելել հիվանդությունները, բարձրացնել կովաբուծության և արոտավայրերի կառավարման արդյունավետությունը։ Սենսորը կարող է հետևել թթվածնի կոնցենտրացիային, օդի ջերմաստիճանին և խոնավությանը, կովի շարժումների քանակին, վերարտադրողական ցիկլերին և կաթի արտադրության ցիկլին»,- նշել են գիտնականները։
Փորձագետներն արդեն փորձարկել են սարքերը մարդկանց վրա և պարզել, որ թեթև վազքը բավական է սարքի կայուն աշխատանքն ապահովելու համար։ Հետազոտողները կարծում են, որ ապագայում տեխնոլոգիան կարող է օգտագործվել սպորտի և առողջապահության ոլորտներում։
