Արցախից հաստատում են, որ Ղարաբաղի իշխանությունների ներկայացուցիչները նախօրեին Լաչինի հարցով հանդիպել են Ադրբեջանի ներկայացուցիչների հետ, ինչի մասին այսօր ավելի վաղ հայտարարել էր Ռուսաստանի արտգործնախարար Սերգեյ Լավրովը: Ըստ նրա՝ հանդիպմանը ներկա է եղել ռուսական խաղաղապահ առաքելության հրամանատար Վոլկովը: 

Սերգեյ Լավրովը նաև պնդել էր, թե ճանապարհի բացման հարցը շուտով կլուծվի։ Մինչդեռ, Արցախի խորհրդարանի «Ազատ հայրենիք- ՔՄԴ» իշխող խմբակցության ղեկավար Արթուր Հարությունյանն «Ազատության» հետ զրույցում ասաց, որ որևէ պայմանավորվածություն ձեռք չեն բերել: Նա նաև չմանրամասնեց, թե ովքեր են մասնակցել այդ հանդիպմանը: 

Լրատվականը հարցրել է.  «Սերգեյ Լավրովն ասել է, որ հանդիպում է եղել արցախցիների և ադրբեջանցիների միջև՝ Վոլկովի մասնակցությամբ, և հույս է հայտնել, որ առաջիկայում բացվելու է ճանապարհը: Դուք տեղյա՞կ եք՝ երբ է հանդիպումը տեղի ունեցել, ովքեր են մասնակցել, և իսկապես կա պայմանավորվածություն, ինչի արդյունքում ճանապարհը կբացվի»: 

Հարությունյանը, պատասխանելով հարցին, ասել է. «Իմ տեղեկություններով՝ այդտեղ հանդիպումը եղել է երկուշաբթի օրը, որևէ պայմանավորվածություն այս պահի դրությամբ չկա»: 

Հնարավոր հանգուցալուծման մասին լրատվականի հարցին Հարությունյանը պատասխանել է, որ նման տեղեկություն ևս չունի, միայն այն է հստակ, որ որևէ պայմանավորվածություն չկա:

Ավելի վաղ՝ երեկ, Ռուսաստանի արտգործնախարարը հեռախոսազրույց էր ունեցել Ադրբեջանի արտգործնախարար Ջեյհուն Բայրամովի հետ և ըստ պաշտոնական հաղորդագրության՝ ընդգծել Լաչինի միջանցքով լիարժեք երթևեկության շուտափույթ վերականգնման անհրաժեշտությունը՝ նոյեմբերի 9-ի հայտարարության չափանիշների հիման վրա։