Alaska Airlines ավիաընկերությունը վերականգնել է Boeing 737 Max 9 ինքնաթիռի թռիչքները այն բանից հետո, երբ երեք շաբաթ առաջ օդում ինքնաթիռներից մեկում պոկվել էին դռների փականները, տեղեկացրել է ABC News-ը։

Ուրբաթ ցերեկը կատարվել է Max 9-ի երկու թռիչք՝ Լաս Վեգասից Պորտլենդ (Օրեգոնի նահանգ) եւ Սիեթլից Օնտարիո (Կանադա)։

Քաղավիացիայի դաշնային վարչությունը (FAA) վերջնական հրահանգներ է հրապարակել ավիաընկերությունների համար, որպեսզի նրանք սկսեն ստուգել իրենց 737 Max 9 ինքնաթիռները։

Չորեքշաբթի ավիաընկերությունը հաստատել է, որ նախատեսում է ուրբաթ երկինք վերադարձնել իր որոշ 737 MAX-9 ինքնաթիռներ՝ մանրակրկիտ ստուգումից հետո։

FAA-ն ուժեղացրել է Boeing-ների վերահսկողությունը եւ սկսել ընկերության ինքնաթիռների արտադրման եւ պատրաստման ստուգումը։

Չորեքշաբթի Boeing ընկերությունը հայտարարություն է արել, որում նշվել է, որ կշարունակի համակողմանի համագործակցությունը FAA-ի հետ։

FAA-ն հայտարարել է, որ հաստատել է ստուգման եւ տեխնիական սպասարկման հրահանգները, նաեւ գումարել է գործողությունների ստուգման խորհուրդ՝ կազմված անվտանգության գծով փորձագետներից, որոնք ուսումնասիրել եւ հավանություն են տվել ստուգման եւ տեխնիկական սպասարկման գործընթացին։

Alaska-ն հավանաբար լիարժեք աշխատանքի կվերադառնա փետրվարի առաջին շաբաթվա ընթացքում, ասել է գլխավոր տնօրեն Բեն Մինիկուչին։ Ավիաընկերությունն ունի 65 737 Max 9 ինքնաթիռ։

Ավելի վաղ FAA-ն դադարեցրել էր Boeing 737 Max 9 տիպի 171 ինքնաթիռների շահագործումն ամբողջ աշխարհում՝ երկնքում տեղի ունեցած միջադեպի պատճառով։

Հունվարի սկզբին Alaska Airlines ավիաընկերության չվերթը կատարել էր չնախատեսված վայրէջք Օրեգոնում, այն բանից հետո, երբ օդում կոտրվել էր իլյումինատորը եւ պոկվել ֆյուզելյաժի մի կտոր։ Միջադեպը հետաքննում է Տրանսպորտի անվտանգության ազգային խորհուրդը։