Հեղեղումներ Ֆրանսիայում. զոհվել է երեք մարդ, կան անհետ կորածներ
Ֆրանսիայի Գար դեպարտամենտի իշխանությունները հաստատել են հեղեղումների հետեւանքով երեք մարդու զոհվելու փաստը։ Հեղեղումները տեղի են ունեցել Ֆրանսիայի հարավ-արեւելքում ուժեղ անձրեւներից հետո։ Չորս հոգի համարվում է անհետ կորած, այդ թվում՝ մեկ տղամարդ եւ նրա երկու երեխաները՝ 4 եւ 13 տարեկան։ Ընտանիքի մայրը փրկվել է եւ հոսպիտալացվել, տեղեկացրել է Euronews-ը։
Տեղեկացվել է, որ մահացածները եւ անհետ կորածները վարորդներ էին, որոնք փորձել էին անցնել հեղեղված կամուրջներն ու որոնց մեքենաները քշել-տարել է ջրի հոսքը։
Շաբաթ օրը «Մետեո Ֆրանսը» տագնապի նարնջագույն մակարդակ է հայտարարել Ֆրանսիայի հարավում՝ ուժեղ անձրեւների պատճառով, կապված Մոնիկա փոթորկի հետ։ Նարնջագույն մակարդակը վտանգի երրորդ մակարդակն է չորս բալանոց սանդղակում եւ կոչ է անում լինել «խիստ զգոն» «սպասվող վտանգավոր երեւույթների պատճառով»։ Խորհուրդ է տրվում խուսափել ճամփորդություններից եւ չմոտենալ ջրատարներին։
