ՆԱՏՕ-ի ռազմական կոմիտեի ղեկավար Ռոբ Բաուերը կարծում է, որ Ռուսաստանը չի ծրագրում հարձակվել դաշինքի երկրների վրա: Ընդ որում, նրա կարծիքով, Մոսկվան հավակնություններ ունի Ուկրաինայից դուրս։

«Չկա որևէ նշան, որ Ռուսաստանը ծրագրում է հարձակվել ՆԱՏՕ-ի անդամ որևէ երկրի վրա։ Չեմ կարծում, որ ուղղակի սպառնալիք կա։ Խնդիրն այն է, որ Ռուսաստանի հավակնությունները դուրս են գալիս Ուկրաինայի սահմաններից։ Մենք դա գիտենք, ուստի դաշինքն ընդհանուր առմամբ պետք է ավելի պատրաստված լինի»,— ասել է պարոն Բաուերը լրագրողներին (մեջբերում Է The Baltic Times-ը)։

ՆԱՏՕ-ի ռազմական կոմիտեի ղեկավարը նաև նշել է, որ հավաքական պաշտպանության մասին ՆԱՏՕ-ի Կանոնադրության 5-րդ հոդվածը կարող է կիրառվել ոչ միայն ուղիղ հարձակման դեպքում, այլև, օրինակ, կիբերհարձակման դեպքում:

Բացի այդ, պարոն Բաուերը մեկնաբանել է ԱՄՆ-ում հնարավոր իշխանափոխությունը։ Նա հայտարարել է, որ չի վախենում ընտրություններում Դոնալդ Թրամփի հաղթանակից։ Նրա կարծիքով՝ Հանրապետականի հայտարարություններն ուղղված էին ոչ թե դաշինքի դեմ, այլ որոշ երկրների կողմից պաշտպանության համար անբավարար ֆինանսավորմանը: Պարոն Բաուերը նշել է, որ ՆԱՏՕ-ի անդամներն արդեն պատրաստ են ավելի շատ վճարել։ Ռոբ Բաուերը մարտին ավելի վաղ հայտարարել էր Ռուսաստանի հետ հակամարտությանը ՆԱՏՕ-ի պատրաստակամության մասին: Հունվարին նա ասել էր, որ դաշինքի ուժերը պատրաստվում են առաջիկա երկու տասնամյակում Ռուսաստանի հետ լայնամասշտաբ պատերազմի։ Նա կոչ է արել ՆԱՏՕ-ի անդամ երկրների իշխանություններին և նրանց քաղաքացիական բնակչությանը պատրաստվել հակամարտությանը և հնարավոր զորակոչին:

Ռուսաստանի իշխանությունները բազմիցս հայտարարել են ՆԱՏՕ-ի երկրների վրա հարձակվելու ծրագրերի բացակայության մասին։ Նախագահ Վլադիմիր Պուտինն ասել է, որ ՌԴ-ն ագրեսիվ մտադրություններ չունի Եվրոպայի երկրների նկատմամբ։