Սյունիքի փոխմարզպետ ու Գորիսի փոխքաղաքապետը՝ Իշխանասարի դեպքերի մասին
Սոցցանցերում և մամուլում ակտիվորեն շրջանառվում է լուրը, որ Սյունիքի մարզում՝ Իշխանասարի ուղղությամբ, մարտեր են ընթանում:
Լրատվամիջոցները հայտնում են, որ հակառակորդը հարձակում է նախաձեռնել ու իբր հայկական կողմից կան վիրավորներ, որոնք տարհանվում են:
Սյունիքի փոխմարզպետ Կարո Ավանեսյանը infocom-ի հետ զրույցում հերքել է մամուլում շրջանառվող այս լուրերը։ Փոխմարզպետը հստակեցրեց, որ Սեւ լճի ուղղությամբ սահմանային ճշգրտումներ են տեղի ունենում, որին մասնակցում են ՀՀ ՊՆ ներկայացուցիչները, իսկ Սյունիքի մարզպետ Մելիքսեթ Պողոսյանն այս պահին ճանապարհվում է դեպի Սեւ լիճ։ Հարձակումների վերաբերյալ տեղեկությունները փոխմարզպետը բացարձակ սուտ է որակում։
Գորիսի փոխքաղաքապետ Մենուա Հովսեփյանը ևս արձագանքել է լուրերին.
«Բանակցություններ են գնում, մարտեր չեն ընթանում։ Մենք այնտեղ զինվոր չենք ունեցել, որ մարտեր լինեն։ Տարածքն ազատ է եղել, ում հետ պետք է մարտ վարեին։
Հակառակորդը GPS-ով գծված սահմանից էլ առաջ են եկել»։
Գորիսի փոխքաղաքապետը նշել է, որ իր տեղեկություններով բանակցությունները վարում է առաջին բանակային կորպուսը։