Վրաստանի նախկին նախագահ Միխեիլ Սաակաշվիլիի փաստաբանները հայտնել են նրա առողջության վատթարացման մասին․ խոսքը, մասնավորապես, այն մասին է, որ նրա մոտ շարժումները դանդաղել են, գրում է МК-ն:

«Դրա հետ մեկտեղ նա մեզ ասաց, որ չի դադարեցնի հացադուլը, որը սկսել էր հոկտեմբերի 1-ին, բանտախցում»,-նշել է քաղաքական գործչի պաշտպան Բեկա Բասիլայան։

Նրա խոսքով ՝ Վրաստանի նախկին նախագահն ընկճված չէ և Վրաստանի քաղաքացիներին կոչ է անում վաղը` հոկտեմբերի 14–ին բողոքի ակցիայի դուրս գալ։

Փաստաբանը նշեց, որ խոսքը համաժողովրդական ակցիայի մասին է։

Սաակաշվիլիի մյուս պաշտպանը՝ Դիմիտրի Սաձագլիշվիլին, քրեակատարողական ծառայությունից պահանջել է Ռուսթավիի բանտ թողնել քաղաքական գործչի անձնական բժշկին՝ զննություն անցկացնելու համար:

Սաակաշվիլին Վրաստան է ժամանել սեպտեմբերի 29-ին՝ 8 տարի արտերկրում ապրելուց հետո։ Հոկտեմբերի 1-ին նրան ձերբակալել են Թբիլիսիում։ Վրաստանում նա մեղադրվում է մի քանի քրեական գործով, որոնցից երկուսով նախկին նախագահին ազատազրկելու վճիռ է կայացվել։