Պետք է հաշվի առնել, թե ինչու է ԵՄ առաքելությունը հրավիրվել Հայաստան։ Պատճառը աշխարհաքաղաքական բնույթ չի կրում․ այն Հայաստանի փորձն է։ Այս մասին FactorTV-ին տված հարցազրույցում ասել է Հայաստանի անվտանգության խորհրդի քարտուղար Արմեն Գրիգորյանը։

Բարձրաստիճան պաշտոնյան հիշեցրել է, որ 2021 թվականին երկու հարձակում է իրականացվել Հայաստանի դեմ, իսկ 2022 թվականի սեպտեմբերին՝ լայնածավալ հարձակում։

«Միեւնույն ժամանակ ուկրաինական հակամարտության սկսվելուց առաջ և սկսվելուց հետո հարձակումներ եղան Հայաստանի վրա, և արձագանքը նույնն էր։ Այս փորձի հիման վրա ԵՄ դիտորդները հրավիրվել են հավելյալ խաղաղության երաշխիքներ ստեղծելու համար։ Միաժամանակ Բաքուն Եվրոպայում հայտարարեց, որ Ռուսաստանը Հայաստանի հետ միասին հարձակում է ծրագրել Ադրբեջանի վրա։ Մենք հավաստիացրել ենք, որ դա հնարավոր չէ։ Կեղծ թեզերի տարածումից խուսափելու համար մենք հրավիրել ենք ԵՄ քաղաքացիական առաքելություն, որը փաստեր է հավաքում»,- նշել է Գրիգորյանը։

Ըստ նրա՝ ԵՄ դիտորդները սահմանների սահմանազատման հարցերին մասնակցելու մանդատ չունեն, սակայն կարող են օգտակար լինել այս հարցում՝ խորհրդատվություն տրամադրելու տեսքով։

«ԵՄ քաղաքացիական առաքելությունը շատ կարեւոր է Հայաստանի համար։ Ցանկալի կլիներ, որ դա լիներ Ադրբեջանի տարածքում, բայց դա տեղի չունեցավ։ Հայաստանը սա համարում է կայունացնող գործոն, որը կնպաստի խաղաղության օրակարգին։ ԵՄ առաքելությունը տեղավորվում է Հայաստանի կողմից խաղաղության օրակարգի իրականացման շրջանակներում։ Սա էր ԵՄ առաքելությանը Հայաստանի եւ Ադրբեջանի միջազգայնորեն ճանաչված սահմանին տեղակայելու հրավեր տալու հիմնական պատճառը»,- հավելել է պաշտոնյան։

Նրա խոսքով՝ ԵՄ առաքելության հետ կապված Ադրբեջանի հռետորաբանությունն ու մտահոգությունը հուշում են, որ Բաքուն տարածքային պահանջներ ունի Հայաստանի նկատմամբ, եւ այդ առաքելությունը կարող է որոշակիորեն սահմանափակել այդ պահանջները, Հայաստանի դեմ ռազմական շանտաժը սահմանափակվում է։

«Պրահայում ձեռք բերված բոլոր պայմանավորվածությունները իրականացվել են։ Երկու ամսով եկած առաքելությունն ավարտեց այն, բայց Հայաստանը հրավիրեց նոր առաքելություն՝ հաշվի առնելով նախկին փորձը։ Սա Հայաստանի ինքնիշխան իրավունքն է։

Ադրբեջանի կողմից սրացումներ հնարավոր են, բայց հուսով ենք, որ դրանք չեն լինի։ Այս հարցում ԵՄ-ն ինտենսիվ կապի մեջ է Բաքվի հետ։

Ե՛վ Ռուսաստանի ներկայացուցիչները, եւ՛ ԵՄ դիտորդները գտնվում են Հայաստանի ինքնիշխան տարածքում։ Մենք կապի մեջ ենք եւ՛ Ռուսաստանի, եւ՛ ԵՄ ներկայացուցիչների հետ, որպեսզի նրանց գործունեությունն իրականացվի հանգիստ եւ պատշաճ մակարդակով։ Մենք կշարունակենք աշխատել այս ուղղությամբ։ Հայաստանը կառավարում է ռիսկերը, որ նրանց միջեւ որեւէ միջադեպ չլինի»,- եզրափակել է Գրիգորյանը։