«Մոտ մեկ ամիս առաջ Հաղթանակ թաղամասում գործող ՀՀ աշխատանքի և սոցիալական հարցերի նախարարության «Երևանի թիվ 1 տուն-ինտերնատ»-ում հաշվառված հերթական տարեցն է ինքնասպանություն գործել»։ Այս մասին գրում է MediaHub-ը:  Նրա անշնչացած մարմինը հայտնաբերել են տուն-ինտերնատի պատշգամբում։

Տեղեկությունը հաստատել են  ՀՀ ներքին գործերի նախարարության լրատվական ծառայությունից։ 

«Մարտի 25-ին, ժամը 08.45-ին ոստիկանություն հաղորդում է ստացվել, զանգահարել է թիվ 1 տուն-ինտերնատի բուժքույրը և հայտնել, որ նույն օրը ժամը 08.35-ի նշված տուն-ինտերնատի պատշգամբում, ճաղավանդակից պարանով կախվելու միջոցով ինքնասպան է եղել իրենց բնակիչ 1954թ. ծնված տղամարդ»,- հայտնել են նախարարության լրատվականից:

Դեպքի կապակցությամբ նշանակվել է դատաբժշկական փորձաքննություն, կատարվում է նախաքննություն:

«Նորմալ մարդ էր, խելոք, անսպասելի էր իր մահը մեզ համար»,-նշել է լրատվականի  աղբյուրը։ 

Հաղորդվում է, որ այս տուն-ինտերնատում արդեն 3-րդ ինքնասպանության դեպքն է գրանցվում վերջին վեց ամսվա ընթացքում։ «Ավելի վաղ գրել էինք, որ ծառից կախման միջոցով ինքնասպան են եղել տուն-ինտերնատի տարեցներ Եղիշե եւ Պերճ պապիկները։

Անցած տարվա հոկտեմբերին մամուլում հայտնվեց միայն 80-ամյա Պերճ Գ.-ի ինքնասպանության մասին լուրը: Վերջինիս մոտ հայտնաբերվել էր նամակ, որում գրված էր, որ իր մահվան մեջ ոչ ոք մեղավոր չէ.

«Եվ որևէ մեկին չմեղադրեք։ Սա իմ մտքի թռիչքն է։ Չեմ դիմանում ցավերին։ Չեմ ուզում ավելորդ տեղը չարչարվեմ»։