ԵԿՄ նախկին նախագահ Մանվել Գրիգորյանի պաշտպաններն այսօր՝ ապրիլի 15-ին, Երևանի ընդհանուր իրավասության դատարանում միջնորդեցին 10 միլիոն դրամ գրավի դիմաց ազատ արձակել Գրիգորյանին: Այս մասին գրում է Armdaily. am-ը: Նշենք, որ այս գործով նախագահող դատավորը Մարինե Մելքոնյանն է: Արդեն 10 ամիս է՝ առաջին ատյանի դատարանում հենց նա է քննում Գրիգորյանի խափանման միջոցի գործով միջնորդությունները և պաշտպանական կողմի համար բացասական ելքով որոշումներ կայացնում: Այսօրվա դատական նիստին նախագահողը ժամանակ տրամադրեց գործով քննիչին իր առարկությունները ներկայացնելու համար: Այդ հիմքով էլ այսօրվա դատական նիստը հետաձգվեց և նշանակվեց ապրիլի 19-ին: Գրիգորյանի պաշտպան Արսեն Մկրտչյանը լրագրողների հետ զրույցում նշեց, որ Մարինե Մելքոնյանը Մանվել Գրիգորյանի գործով կանխակալ մոտեցում է ցուցաբերում: Պաշտպանի խոսքով՝ բոլոր անդառնալի հետևանքները, որոնք պատճառվել են Մանվել Գրիգորյանի առողջությանը՝ արդյունքն են նաև դատավոր Մարինե Մելքոնյանի ցուցաբերած սուբյեկտիվ մոտեցման: