Ամուլսարի շուրջ քառօրյա լարվածությունը թուլացավ այսօր՝ օգոստոսի 7–ի երեկոյան, երբ Ջերմուկի քաղաքապետարանի և ոստիկանության ուժերով «Լիդիան Արմենիա» ընկերության պահնորդական խմբի վագոն տնակները  ճամփեզրից տեղափոխեցին մի քանի մետր հետ՝ «Լիդիան Արմենիայի» սեփականություն հանդիսացող տարածք, իսկ Ամուլսարի պահապանների վագոն տնակը վերադարձրին սեփականատիրոջը։

Ամուլսարի հանքի շահագործման դեմ բողոքող քաղաքացիները հեռացան, բայց նշեցին, որ շարունակելու են հսկել տարածքը և ոչ մի գնով թույլ չեն տալու բացել հանքը։

Նրանք նաև նշեցին, որ առայժմ իրենց պահանջներից միայն մեկն է բավարարվել, իսկ գլխավոր պահանջը՝ Ամուլսարի հարցի լուծման հստակ ժամկետ կառավարությունից նրանք այդպես էլ չեն լսել։

Ցուցարարների հետագա գործողությունները կախված կլինեն կառավարության քայլերից։