ՌԴ-ում 52 մարդու կյանք խլած հանքի պայթյունի գործով ձերբակալվել է 5 մարդ. հանքից մեկ մարդ է ողջ դուրս բերվել
Ռուսաստանում «Լիստվյաժնայա» ածխահանքում երեկ տեղի ունեցած մեթանի պայթյունից զոհվել է 52 մարդ, այդ թվում՝ 6 փրկարարներ:
Այսօր առավոտյան զոհված փրկարարներին հետմահու շնորհել են Արիության շքանշան: Հաջողվել է ողջ վիճակում հանքից դուրս հանել փրկարար Ալեքսանդր Զակովրյաշինին:
«Դա արդեն հրաշք է, կարծում եմ, այլևս ողջ մարդ չենք գտնի՝ հաշվի առնելով հանքում տեղի ունեցած վթարի աստիճանը», - ասել է Կեմերովոյի շրջանի նահանգապետ Սերգեյ Ցիվիլյովը:
Հանքափորները մինչ այդ էլ գանգատվել են հանքում մեթան գազի բարձր մակարդակի կապակցությամբ:
Պայթյունի փաստով հարուցվել է քրեական գործ, ձերբակալվել է 5 մարդ, այդ թվում՝ հանքի տնօրենը, նրա տեղակալը, արտադրամասի պետը և «Ռոստեխնադզոր»-ի երկու աշխատակիցներ, ովքեր մինչ այդ ստուգումներ են իրականացրել և արտոնել են հանքի շահագործումը:
