Զոհված զինծառայողների հարազատները ՔԿ-ի մոտ են
44-օրյա պատերազմում զոհված զինծառայողների հարազատները հավաքվել են Քննչական կոմիտեի դիմաց:
«Հինգ օր առաջ մենք դիմում ենք ներկայացրել Արգիշտի Քյարամյանին, որ իջնի ներքև, և մեզ պատասխան տա ինքնաբացարկի համար։ Թող իջնի, մենք հարցեր ունենք իրեն տալու»,- նշեց ծնողներից մեկը։
Հիշեցնենք, որ օրերս վարչապետ Նիկոլ Փաշինյանին ձերբակալելու պահանջով Քննչական կոմիտեի զինվորական քննչական գլխավոր վարչություն էին եկել 44-օրյա պատերազմում զոհված զինծառայողների այն ծնողները, որոնք վերջերս զոհված զինծառայողների մահվան դեպքի առթիվ հարուցված քրեական գործով տուժողի իրավահաջորդի կագավիճակ են ստացել։
Տուժողի իրավահաջորդները քրեական գործով հարցաքննվելուց հետո տեղեկացել էին, որ Նիկոլ Փաշինյանին ձերբակալելու իրենց միջնորդությունը զինվորական դատախազությունը մերժել է, իսկ որպես մեղադրյալ ներգրավելու եւ հարցաքննության հրավիրելու միջնորդությունների լուծումը՝ հետաձգել։ Ծնողներին վրդովվեցրել է այդ որոշումը, կոմիտեի ներսում իրավիճակն այնքան էր լարվել, որ, ըստ ծնողների՝ աշխատակիցների կողմից իրենց հասցեին հնչել էին վիրավորական արտահայտություններ եւ հայհոյանքներ։
Դրանից հետո դատարանը որոշում է կայացրել Վերաքննիչ քրեական դատարանում Նիկոլ Փաշինյանի կողմից պետական դավաճանության հատկանիշներով քրգործ հարուցելու պահանջով բողոքի քննությունը անցկացնել դռնփակ։
Այս որոշումը զայրացրել է զոհված զինծառայողների հարազատներին։ Նրանք պահանջում են՝ դատավարությունը շարունակել դռնբաց կարգով, թուլատրելով և ծնողներին, և լրագրողներին մասնակցել նիստերին, ապահովելով նաև այդ նիստերի հասանելիությունը հանրությանը:
