Հռոմի պապ Ֆրանցիսկոսը մտահոգություն է հայտնում Լեռնային Ղարաբաղում հումանիտար իրավիճակի կապակցությամբ։

Այսօր Հռոմի պապը կոչ է արել բոլոր կողմերին գտնել «խաղաղ լուծումներ՝ ի շահ ժողովրդի»։ Այս մասին գրում է Vaticannews-ը։ Նա հայտարարել է, որ իրեն «անհանգստացնում է Հարավային Կովկասում՝ Լաչինի միջանցքում, տիրող իրավիճակը»։

«Ես մտահոգված եմ մարդկանց հումանիտար ծանր վիճակով, որը սպառնում է ավելի վատթարանալ ձմեռային սեզոնի ընթացքում», - ասել է նա:

Հիշեցնենք՝ դեկտեմբերի 12–ին, առավոտյան ժամը 10:30-ի հատվածում, քաղաքացիական հագուստներով մի խումբ ադրբեջանցիներ, կրկինբնապահպանական պատճառաբանությամբ, փակել են Ստեփանակերտ-Գորիս մայրուղին։ Ադրբեջանական կողմը խախտելով 2020 թվականի նոյեմբերի 9-ի եռակողմ համաձայնագրի դրույթները, բնապահպանական պատճառաբանություններով փակել է Արցախն աշխարհին կապող միակ ճանապարհը, ոտնահարելով քաղաքացիական բնակչության կենսական շահերն ու իրավունքները: 

 Դեկտեմբերի 13–ին էլ Ադրբեջանը դադարեցրել էր Արցախի գազամատակարարումը։ Երեկ՝ դեկտեմբերի 16–ին, Արցախի պետնախարար Ռուբեն Վարդանյանը իր ուղիղ եթերի ժամանակ ասել էր, որ առանց որեւէ նախապայմանների, առանց իրենց կողմից որեւէ զիջումների, Ադրբեջանը վերականգնել է գազի մատակարարումը: Նա նշել էր, որ օրվա մեջ կարող է ճանապարհը բացվի, սակայն այդ հայտարարությունից մեկ օր անց էլ՝ Արցախը Հայաստանին կապող միակ ճանապարհը շարունակում է փակ մնալ։