Ամերիկյան բորսաները հայտարարել են ռուսական հայտնի ընկերությունների արժեթղթերի ցուցակից հանելու մասին
Nasdaq և NYSE ամերիկյան բորսաները հայտարարել են ռուսական ընկերությունների` Yandex, Ozon, HeadHunter, CYAN և Qiwi արժեթղթերի` ցուցակից հանելու մասին:
Ի՞նչ է նշանակում ցուցակից հանել: Սա թողարկողի արժեթղթերի բացառումն է այն բաժնետոմսերի ցանկից, որոնց համար կատարվում են քլիրինգային հաշվարկներ (գործարքի փաստաթղթային ամրագրում) առևտրային նստաշրջանի արդյունքներով:
Եթե որոշումը չբողոքարկվի, ռուսական այս ընկերությունների արժեթղթերը մարտի 24-ից կհանվեն ցուցակից։ Yandex-ը, ըստ Nasdaq կայքի, արդեն հայտարարել է բողոք ներկայացնելու մտադրության մասին։
Այս ընկերությունների արժեթղթերի առևտուրը դադարեցվել էր ամերիկյան բորսաներում 2022 թվականի փետրվարի վերջին՝ Ուկրաինա ռուսական զորքերի լայնամասշտաբ ներխուժման մեկնարկից մի քանի օր անց։