«Ֆրանսիան չի կարող դրական ազդեցություն ունենալ ԼՂ խնդիրների լուծման հարցում». Զախարովա
Մեզ զարմացնելը դժվար է, բայց նախագահ Մակրոնին դա երբեմն հաջողվում է: Այս մասին ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Ֆրանսիայի նախագահ Էմանուել Մակրոնի՝ հունիսի 28-ին Մարսելում տարբեր ազդեցիկ շրջանակների ներկայացուցիչների հետ հանդիպմանն արած հայտարարությունն առ այն, որ «նա Արցախի հարցով ճնշում է գործադրում Ադրբեջանի նախագահ Իլհամ Ալիևի նկատմամբ և որ Արցախի հարցում ինքը միակն է, որ հստակ դիրքորոշում և ուղերձ ունի»։
«Մենք չենք զարմանում Մակրոնի պաթոսի վրա․ գործընթաց կա, իսկ արդյունք չկա, որովհետև ոչ ոք այդ արդյունքները չի տեսել, ու՝ ոչ միայն Լեռնային Ղարաբաղի կարգավորման հարցում։ Ֆրանսիան չի կարող դրական ներդրում ունենալ Լեռնային Ղարաբաղի բարդ խնդիրների լուծման հարցում։ ԵԱՀԿ Մինսկի խմբի փլուզումը նաև Ֆրանսիայի պատճառով էր, այդ թվում՝ ԵՄ մշտադիտարկման խմբի կասկածելի մանդատի հաստատումը։ Այս բոլոր ցուցադրական քայլերը ոչ թե կողմերին օգնելու համար են, այլ Ռուսաստանին կարգավորման գործընթացից դուրս մղելու համար»,- նշել է ԱԳՆ խոսնակը։
