Պաղեստինի նոր վարչապետը խոստացել է վերականգնել Գազայի հատվածը
Պաղեստինի նորանշանակ վարչապետ Մուհամմեդ Մուստաֆան հայտարարել է Պաղեստինի ազգային վարչակազմի բարեփոխումներ իրականացնելու և Գազայի հատվածի վերականգնման աշխատանքները սկսելու մտադրության մասին, հայտնում է AP-ն։
Պաշտոնյան խոստացել է վարչակազմի ինստիտուտների լայնածավալ բարեփոխումներ, կոռուպցիայի նկատմամբ անհանդուրժողականություն և պաղեստինյան բոլոր տարածքների վերամիավորում։
Նա նաև նախատեսում է ստեղծել անկախ գործակալություն, որը կզբաղվի Գազայի վերականգնմամբ և հավատարմագրային հիմնադրամով միջոցների հայթայթմամբ:
AP-ն պարզաբանում է, որ հայտարարության մեջ չի հիշատակվել ՀԱՄԱՍ խմբավորումը, որը, անկախ Պաղեստինի ազգային վարչակազմից, վերահսկում է Գազայի հատվածը 2007 թվականից անկլավում տեղի ունեցած հեղաշրջումից հետո։
Պաղեստինի ազգային վարչակազմի ղեկավար Մահմուդ Աբասը մարտի 14-ին Մուստաֆային նշանակել է վարչապետ և հանձնարարել նրան կառավարություն ձևավորել:
