ՀՀ վարչապետ Նիկոլ Փաշինյանն, անդրադառնալով զինծառայությունից ազատվելու դեպքերին, նշել է, թե կան բազմաթիվ սողանցքներ, և պրակտիկան էլ թույլ տալիս է լայնորեն օգտագործել դրանք։

«Մեր իրավապահ համակարգում, եթե չասեմ բազմաթիվ, ապա գոնե մի քանի նման աղմկոտ դեպքեր հիշում եմ, երբ զորահավաքային համակարգի, առողջապահության համակարգի աշխատակիցների ներգրավմամբ սխեմաներ են գործում»,- ասել է նա՝ հավելելով, որ ՊՎԾ վերահսկողության արդյունքում զարմանալի փաստ են հայտնաբերել. «Արձանագրվում է, որ զորակոչիկի ուղեղում կիստա կա, բայց հետո դա հնարավոր չէ նույնականացնել, էն հետազոտության տվյալը, որին հղում է արվում, հենց այդ մարդու հետազոտության տվյալն է, թե տիպային կիստա ունենք, որ «քսերոքս»-ով բոլորի գործերի մեջ դնում ու ազատում ենք։ Այսպիսի խորը խնդիրներ ու պրոբլեմներ կան։

Ո՞ւմ մտքով կանցներ, որ երկրի էլիտար երկու մասնագիտություն կրողների միջև այդպիսի լայն համագործակցություն կա՝ ընդդեմ պետության: Եվ շատ էական է, որ այս ահազանգերը, իրավիճակները այդ համակարգերը մեզ կարմիր դրոշ ծածանել, թե այսպիսի խնդիր կա»։

Նա նաև հարցրել է, թե ինչու առողջապահության և պաշտպանության նախարարությունների առաջնային օղակները չեն զեկուցել կառավարությանը. «Կարո՞ղ է՝ պետք է խումբ ձևավորենք, որ այս հարցի պատասխանը ստանանք»։

Վարչապետը նաև նշել է, որ առաջնային օղակներից համապատասխան զեկույցներ չեն գալիս. «Խորը համակարգային, պետական համակարգի ճգնաժամն այստեղ է երևում»։