Քաղաքապետարանի «քթի տակ» վնասված դիտահորը վարորդների համար դարձել է պատուհաս
Երեկվանից SHAMSHYAN.com-ը ահազանգեր է ստանում քաղաքացիներից, ովքեր վրդովված հայտնում են, որ արդեն 3 օրից ավելի է, Երևանի կենտրոնում՝ Արգիշտի փողոցում՝ Երևանի քաղաքապետարանի «քթի տակ», դիտահորը դարձել է իսկական պատուհաս վարորդների համար: Հարևանությամբ բնակվող բնակիչներն էլ ասում էին. «Գիշերները քնել չի լինում, քանի որ վարորդները, չնկատելով այդ անհարմարությունը, վթարի են ենթարկվում: Միայն երջանիկ պատահականությամբ է, որ զոհեր ու վիրավորներ չկան: Զանգահարել ենք Երևանի քաղաքապետարանի թեժ գիծ, «Վեոլիա Ջուր» ընկերություն, սակայն ստացել ենք նույն քոփի փեստ արած պատասխանը՝ Ձեր զանգը գրանցվել է, հիմա կմոտենանք: Արդեն 3-րդ օրն է, մոտենում են: Ասես դարձած լինեն «Նոյի ագռավ»:
Մնում է, հետևներից մի աղավնի ուղարկենք, որ լավ լուր բերի, իսկ լավ լուրը այն կլինի, որ գան դիտահորը վերանորոգեն: Միայն օպերատիվորեն ահազանգերին արձագանքել են ՀՀ ոստիկանության պարեկային ծառայության Երևանի գնդի 1-ին գումարտակի 1-ին վաշտի պարեկները՝ վաշտի հրամանատար Հարություն Գրիգորյանի, պարեկներ Նվեր Մուրադյանի, Տարոն Անտոնյանի գլխավորությամբ: Վերջիններս կարգավորում են նաև երթևեկությունը և ուղորդում վարորդներին, որպեսզի չհայտնվեն վնասված դիտահորի «ճիրաններում»»: