Լույս հունվարի 21-ի գիշերը տեղի կունենա արտասովոր բնական երևույթ՝ գերլուսնի ամբողջական խավարում, գրում է The Guardian-ը, տեղեկանում ենք tert.am-ից: Պարբերականը մանրամասնում է, որ Լուսինը 62 րոպե կանցկացնի Երկրի ստվերի ամենախոր հատվածում: Այդ ընթացքում երկնային մարմինը մթնոլորտային ազդեցության արդյունքում կարմրա-դարչնագույն երանգ կստանա: Արդյունքում կդիտվի նաև «արյունոտ Լուսին» երևույթը: Երևույթին հետևելու հնարավորություն չեն ունենա Ասիայի, Ավստրալիայի և Նոր Զելանդիայի բնակիչները: Ընդհանուր առմամբ, ամբողջական խավարումը կտևի ավելի քան 3 ժամ 20 րոպե: Հայտնի է, որ այս տարի կդիտվի երեք գերլուսին՝ հունվարի 21-ին, փետրվարի 19-ին և մարտի 21-ին: Լուսնի հաջորդ ամբողջական խավարումը տեղի է ունենալու 2021թ. մայիսի 26-ին: