Ադրբեջանցի լրագրողները ներթափանցել են չեզոք գոտում գտնվող Եղիշե Առաքյալի վանք
Ադրբեջանցի լրագրողները երեկ՝ դեկտեմբերի 16-ին, ներթափանցել են Մարտակերտի շրջանի Մատաղիս գյուղի մոտակայքում գտնվող Եղիշե Առաքյալի վանք: Այս մասին News.am-ի հետ զրույցում ասել է Արցախի Հանրապետության ԿԳՄՍ փոխնախարար Լեռնիկ Հովհաննիսյանը:
«Եկեղեցին չեզոք գոտում է: Մենք դեռեւս չգիտենք, թե ինչպես են իրենք կարողացել մտնել եկեղեցի եւ ինչ են արել այնտեղ: Եկեղեցին Մատաղիսից 5-6 կմ հեռավորության վրա է, եւ այն ավելի մոտ է ադրբեջանական դիրքերին, քան մեր, դրա համար գուցե իրենք կարողացել են հեշտությամբ ներթափանցել: Մենք չգիտենք՝ այդ հատվածում խաղաղապահներ կան, թե՝ ոչ: 2021 թվականին տեսանյութ էր տարածվել համացանցում, որտեղ երեւում էր, որ զինված ադրբեջանցիները մտնում են Մատաղիսի Սուրբ Գեւորգ եկեղեցի եւ պղծում այն: Այն սխալմամբ ներկայացվեց որպես Եղիշե Առաքյալի վանք, բայց այն հստակ Մատաղիսի գյուղամիջյան եկեղեցին էր, անգամ գյուղի ջրամբարն էր երեւում»,- նշեց նա:
Լեռնիկ Հովհաննիսյանի խոսքով՝ սա Եղիշե Առաքյալի վանք մուտք գործելու մասին առաջին ահազանգն էր, որն իրենց հայտնի է: Պատերազմի ավարտից հետո հայկական կողմը չի մտել վանք՝ հաշվի առնելով վտանգը:
