ՌԴ–ում քննիչները 19 տարի անց կարողացել են բացահայտել «թիվ 11 գրոհայինի» ինքնությունը՝ հինգ ահաբեկիչներից մեկի, որոնց դիերը 2004թ.–ին չէին կարողացել ճանաչել:

Իրավապահների տվյալներով՝ խոսքը ծագումով Ինգուշեթիայից Ասլանբեկ Պարչիևի մասին է, որը մասնակցել է Բեսլանի թիվ 1 դպրոցում տեղի ունեցած ահաբեկչությանը։ 

«Այս մարդը 19 տարի առաջ Բեսլանում տեղի ունեցած սարսափելի ահաբեկչության գործով փաստաթղթերում հայտնվել է որպես «թիվ 11 գրոհային»։ Նրա մատնահետքերը համընկնում են ծագումով Ինգուշեթիայից Ասլանբեկ Պարչիևի մատնահետքերի հետ, ով ողբերգությունից երկու տարի առաջ ձերբակալվել էր Մոսկվայում աննշան իրավախախտման համար»,- գրում է Известия-ն՝ վկայակոչելով անվտանգության աշխատակիցներին։ 

Հետաքննության եզրակացությունները հաստատվել են զինյալի հարազատներից վերցված ԴՆԹ անալիզով։ Նրան ճանաչել է նաև միակ ողջ մնացած զինյալը՝ Նուրփաշա Կուլաևը, ով դատապարտված է ցմահ: 

Գործողությունների երրորդ օրը՝ ժամը 13:05-ին, դպրոցի մարզադահլիճում տեղի են ունեցել պայթյուններ, որի պատճառով առաջացել է հրդեհ։ Հրդեհի արդյունքում մասնաշենքը մասնակիորեն այրվել է։ Առաջին պայթյուններից հետո պատանդները սկսել են փախչել դպրոցից. ՌԴ անվտանգության դաշնային ծառայությունը ձեռնամուխ է եղել գրոհի։ Անկանոն փոխհրաձգության ժամանակ, այդ թվում նաև քաղաքացիական անձանց կողմից, որոնք կիրառել են անձնական զենքեր, սպանվել է 28 ահաբեկիչ (նրանցից 3-ը, այդ թվում նաև մահապարտ ահաբեկչուհին, սպանվել են սեպտեմբերի 1-2-ն ընկած ժամանակահատվածում):

Հարձակման զոհ է դարձել 318 պատանդ (186-ը՝ երեխաներ)։