Դուք որպես պետության ղեկավար պատկերացնում եք` ինչպե՞ս է այս հարցը լուծվելու, ի՞նչ ենք անելու մենք, եթե ադրբեջանցի «բնապահպանները» չբացեն ճանապարհը: Auroranews.am-ի հարցին պատասխանելով Փաշինյանը նշեց, որ սուր հայտարարություններ է անելու:

 «Այս համատեքստում կանեմ մի շարք հայտարարություններ, որոնք սուր կլինեն: Բայց մենք դրանց պետք է վերաբերվենք աշխատանքային տրամաբանության մեջ: Ի՞նչ է ուզում Ադրբեջանը. օրինակ, կա տեսակետ, որ Ադրբեջանն ուզում է վերացնել հայկական պետությունը: Տեսնում եք՝ ինչ խոսույթ է զարգացնում Ադրբեջանը: Երբ փորձում ենք հասկանալ՝ ինչու է Ադրբեջանն այդպես վարվում, փորձագետներ կան, որ հետևյալն են ասում՝ Ադրբեջանն այդպես վարվում է, որովհետև մտածում է, թե հայերեն էլ իրենց հերթին ուզում են վերացնել ադրբեջանական պետությունը»: Փաշինյանը նշեց, որ Ադրբեջանը շարունակաբար ատելության խոսք է զարգացնում՝ նաև կրթական մակարդակում: 

«Որն է մեր տեսլականը. մեծ հաշվով Լաչինի միջանցքի իրադրությունը սևով սպիտակի վրա գրված է: Ուզում եմ ցավով նշել, որ հիմա շատերը հղում են անում նոյեմբերի 9-ի հայտարարությանը, այնինչ նոյեմբերի 10-ին շատերը դա համարում էին անընդունելի: Այս սադրանքը ունի նպատակ՝ կոտրել ԼՂ բնակիչների կամքը՝ ապրել սեփական հայրենիքում և 2-րդը՝ Հայաստանին ներքաշել ավելի մեծ սադրանքի մեջ: Մենք այս միջազգային անդրադարձը պետք է կապիտալիզացնենք: Այստեղ շատ կարևոր է ՌԴ դիրքորոշումը: Եթե պարզվի, որ ՌԴ-ն այդ պատրավորությունը չի կարողանում կատարել, ինքը պետք է դիմի ՄԱԿ-ի անվտանգության խորհրդին՝ ռուսական խաղաղապահներին մանդատով օժտելու կամ միջազգային խաղաղապահներ ուղարկելու համար: Սա է մեր ճանապարհը:
Հաջորդը մեր արձագանքը այս ամեն ինչին պետք է լինի ասիմետրիկ: Մենք պետք է մեր պետության ինստիտուցիոնալ օրակարգից չշեղվենք»,- ասաց նա: