Ֆինլանդիայում առգրավվել են Գիտության և մշակույթի ռուսական կենտրոնի հողն ու շենքը
Ֆինլանդիայի իշխանությունները, ԵՄ պատժամիջոցների պատճառով, կալանել են Գիտության և մշակույթի ռուսական կենտրոնի շենքը, ինչպես նաև այն հողատարածքը, որի վրա գտնվում է շենքը։ Այս մասին գրում է Helsingin sanomat թերթը՝ պարտքերի հավաքագրման բաժնին հղումով։
Ըստ անշարժ գույքի սեփականության վկայականի՝ հողամասը պատկանում է Ռուսաստանի Դաշնությանը, իսկ ավելի վաղ՝ Խորհրդային Սոցիալիստական Հանրապետությունների Միությանը։ Հրապարակման համաձայն՝ 3326 քառակուսի մետր ընդհանուր մակերեսով ռուսական գույքը կալանելու մասին որոշումը դատական կարգադրիչները կայացրել են մեկ շաբաթ առաջ՝ հանրապետության արտաքին գործերի նախարարության համապատասխան հարցման կապակցությամբ։
Բացի այդ, Հելսինկիում կալանվել են յոթ բնակարաններ՝ կապված «նրանց հետ, ովքեր գտնվում են ԵՄ սահմանափակումների տակ»: Դրանց մակերեսը տատանվում է 36-ից 175 քմ։ Ըստ Helsingin Sanomat-ի՝ Գիտության և մշակույթի ռուսական կենտրոնը, ինչպես նաև սառեցված բնակարանները, պատկանում են «Ռոսսոտրուդնիչեստվոյին»:
Ըստ թերթի՝ ռուսական ակտիվների սառեցումը ժամանակավոր միջոց է։ Այն ուժի մեջ կլինի երեք շաբաթ (ապրիլի 11-ից): Այս ընթացքում Ֆինլանդիայի իրավապահ մարմինները պետք է որոշեն, թե արդյոք կենտրոնի շենքը և դրա հողատարածքը վերահսկվում են այն անձանց կողմից, որոնց նկատմամբ Եվրամիությունը պատժամիջոցներ է սահմանել։ Սահմանափակող գործողության ընթացքում Ռուսաստանին և այլ կառույցների չի թույլատրվում փոխանցել, ոչնչացնել կամ գրավադրել առգրավված գույքը։
Մարտի վերջին Talouselm-ը գրել էր, որ պարտքերի հավաքագրման բաժինը արգելափակել է կենտրոնի բանկային հաշիվները Nordea բանկում։ Որոշումն ընդունվել է մարտի 10-ին։ Գործակալությունը վարկային և ֆինանսական հաստատությանը արգելել է դրամական միջոցներ փոխանցել և վճարել որևէ մեկին, բացի կարգադրիչից։
Գիտության և մշակույթի կենտրոնը Հելսինկիում բացվել է 1977 թվականին խորհրդային իշխանությունների կողմից։ ԽՍՀՄ փլուզումից հետո Ռուսաստանը սկսեց տնօրինել կենտրոնի ունեցվածքը։ Կազմակերպությունն իր հիմնական նպատակն է կոչում նպաստել ռուս-ֆիննական մշակութային, կրթական, հումանիտար և գիտական նախագծերի իրականացմանը։ Կենտրոնում անցկացվում են տարբեր ցուցահանդեսներ, հանդիպումներ ռուս տարբեր գործիչների հետ և միջոցառումներ Ռուսաստանից ժամանած արվեստագետների հետ։ Ըստ Helsingin Sanomat-ի՝ 2022 թվականի ամռանը այն դադարեցրել է իր գործունեությունը։