Լաչինի միջանցքում ադրբեջանական կողմից առևանգված 3 ուսանողների հարցը ԿԽՄԿ–ի ուշադրության կենտրոնում է։ Լրագրողների հետ զրույցում այս մասին ասել է Հայաստանում Կարմիր խաչի միջազգային կոմիտեի պատվիրակության հաղորդակցման ծրագրերի ղեկավար Զառա Ամատունին։

«Մենք այս մասին կարող ենք ավելի ուշ խոսել, բայց հարցը մեր ուշադրության կենտրոնում է»,– նշել է Ամատունին։

Անդրադառնալով հուլիսի 29-ին առևանգված Վագիֆ Խաչատրյանի հարցին` Ամատունին նշեց` սա ևս իրենց ուշադրության կենտրոնում է։

«Տեսակցել ենք մի քանի անգամ, վերջին տեսակցությունը եղել է օգոստոսի 14-ին»,– հայտնել է Ամատունին։

Ամատունու խոսքով` Գյումրի–Երևան ճանապարհին տեղի ունեցած ողբերգական ավտովթարից մահացած 21-ամյա Հելեն Դադայանի դին Արցախ տեղափոխելու հարցում ևս այս պահին առաջընթաց չկա, որի մասին կկարողանան խոսել, սակայն այս ուղղությամբ աշխատանքը շարունակվում է։

Հիշեցնենք` հուլիսի 29-ին անհետաձգելի բուժօգնության համար Արցախից Հայաստան ԿԽՄԿ միջնորդությամբ և ուղեկցությամբ տեղափոխվելիս Ադրբեջանի սահմանապահ ծառայության ներկայացուցիչներն առևանգել էին Վագիֆ Խաչատրյանին։

Օգոստոսի 28–ին էլ Արցախից Հայաստան խաղաղապահ զորակազմի ուղեկցությամբ տեղափոխվելիս ադրբեջանական կողմն առևանգել էր 3 ուսանողների` Ալեն Սարգսյանին, Վահե Հովսեփյանին և Լևոն Գրիգորյանին, որոնք գալիս էին Հայաստանում սովորելու։

Օգոստոսի 14-ին Գյումրի–Երևան տեղի ունեցած ողբերգական վթարի հետևանքով զոհված Հելեն Դադայանն էլ ծնունդով Արցախի Ճարտար գյուղից է։ Նրա աճյունը ադրբեջանական կողմը թույլ չի տալիս Արցախ տեղափոխել, աղջկա մարմինը Գորիսի դիահերձարանում է։